Comerma: as pegadas dun científico en Ferrol para celebrar o Día da Ciencia

É difícil resumir a vida e, sobre todo, os intereses dunha figura coma o catalán Andrés Avelino Comerma, enxeñeiro e xeneral do exército na Armada, en Ferrol, e unha das figuras máis destacadas da ciencia galega na segunda metade do século XIX. Enxeñeiro, arquitecto e paisaxista, tamén destacou pola promoción do folclore popular galego. Hoxe, a Academia Galega das Ciencias celebra o Día da Ciencia no Ferrol, e para acompañar a celebración, o Consello da Cultura Galega publicou, na plataforma Roteiros da Cultura Galega de culturagalega.gal, o roteiro "O Ferrol de Comerma". Deseñado e redactado por Guillermo Llorca, experto na vida e obra do militar, o roteiro permite coñecer as pegadas biográficas e intelectuais de Comerma no casco vello de Ferrol. Sedes de xornais, de institucións cívicas e algúns dos proxectos nos que participou, desde o deseño de xardíns ou a dirección temporal das obras do Teatro Jofre ata o seu proxecto máis significativo: a construción do Dique da Campá.