Hai mesas redondas, pero tamén hai espectáculos. “Hai unha idea errónea de que a filosofía e o pensamento en xeral responden á imaxe do pensador de Rodin, da persoa illada en si mesma, pero pensar é compartir ideas, conceptos, experiencias mesmo en momentos lúdicos e isto é o que buscamos neste primeiro Festival de Filosofía”, explica Carme Adán, coordinadora da Sección de Pensamento do CCG. Os vindeiros 25 e 26 de setembro celebrarase en diferentes espazos da cidade de Santiago o Festival de Filosofía, que baixo o título de "Libres. En serio???", quere discutir sobre os seus límites e natureza no tempo das redes dixitais. Desde unha mesa redonda sobre series na que participará o director Pepe Coira e a directora de cine Sonia Méndez, moderados por África López Souto ata outra charla titulada "Tinder, poliamor e outras formas de amar", coordinada por Inma López Silva, e na que participarán Valérie Tasso e Francisco Castro. Pola súa banda, os xornalistas Rafa Cabeleira e Lucía Taboada falarán sobre fútbol, moderados por Celia Pereira. Obras de teatro completan o evento, para o que preciso rexistrarse electronicamente.
