O Consello da Cultura pon en marcha 'Na voz da obra', un proxecto web para difundir as artes visuais

Sobre a base de catálogo do arquivo virtual de artistas actuais de Galicia, Atalaia, creado polo Consello da Cultura Galega en 2010 este organismo independente ven de pór en marcha o proxecto Na voz da obra, no que personalidades de diferentes ámbitos ofrecen unha lectura e posta en valor sobre determinadas obras. Esta iniciativa de difusión cultural comeza hoxe coa ollada do narrador oral Celso Fernández Sanmartín (Lalín, 1969) sobre a peza A memoria do álbum. 1 de Manuel Sendón. Desde agora cada mércores no sitio web oficial do CCG unha persoa convidada escollerá unha obra do catálogo e fará un comentario sobre ela dende a ollada crítica do audiovisual, a estética, a poesía, a música, a ciencia ou a filosofía. Deste xeito, a voz dialogará coa obra nun xogo de experiencia sensorial múltiple arredor dunha obra de arte da man dunha figura de diferentes áreas.

"Esta peza lémbrame un álbum de fotografías ao que lle arrincaron unha" comeza dicindo o contacontos Celso Fernández Sanmartín sobre a obra A memoria do álbum. 1 do fotógrafo Manuel Sendón (A Coruña, 1951). Para o narrador lalinense, "a nivel plástico esa abstracción é moi suxestiva porque a memoria é moi imaxinativa e a cabeza sempre quere saber que foto debía haber aí para completar o relato". Aproveita así para contar dúas emotivas historias que lle evoca esta peza.


Atalaia
A plataforma Atalaia acolle unha ampla mirada panorámica da obra de 74 artistas, cunha numerosa selección de obras. Pinturas, esculturas, fotografías ou instalacións coas súas respectivas fichas técnicas, que se complementan coa información de exposicións, actividades e publicacións relacionadas de arte contemporánea e un directorio de espazos expositivos. Atalaia dispón tamén de itinerarios, visitas guiadas aos fondos da base de datos por parte de comisarios que introducen o visitante nas características das obras de arte seleccionadas. Unha forma de divulgación para introducir aos usuarios nas tendencias e características da arte contemporánea galega actual.