17º Ribeira Sacra Festival 2019 Fotos oficiais: JavierPhotoRosa
Non hai moito o panorama de festivais de verán aparecía como algo desolador, con cancelacións caendo unha tras outra e co único horizonte de 2021 coma promesa de recuperación dese oferta concreta. Pero agora a realidade é que non son todos os formatos que sufrirán ese destino e hai algún destes eventos que poden adaptarse ás circunstancias actuais. Nese sentido chegou o anuncio de que o festival 17° Ribeira Sacra terá edición este mesmo ano. Esta cita tan especial cun entorno privilexiado atopou finalmente nas súas propias características contrarias á masificación e de pequenos encontros os elementos necesarios para sacar adiante entre o 30 de xullo e o 2 de agosto a que presentan como “a edición máis especial” do evento. Desde a organización aínda non avanzan o que será o programa pero apuntan ás limitacións que haberá, de asistencia de público ou das posibilidades de traer artistas internacionais. Limitacións que non impedirán en todo caso realizar este ano a cita co patrimonio, cultural, natural e gastronómico da Ribeira Sacra e tamén coa música, como é marca deste festival que nos poucos anos que leva, desde 2017, acadou sona e reputación nun panorama que, ata este ano, tiña que competir con macroeventos.
Desde as marxes do alternativo, o independente e o pequeno outras citas súmanse a salpicar de ofertas o panorama do verán de festivais. É o caso do Felicia Pop de Limodre (Fene) que repetirá este ano os días 7 e 8 de agosto. Cincocentas persoas poderán asistir a esta cita, coas medidas de seguridade de obrigatorio cumprimento que xa ten confirmadas ademais varias bandas de rock como The Homens, Los Pepes, Los hermanos Dalton, Lie Detectors e Los Fusiles. As entradas custan cinco euros e xa están en reserva. Na Coruña será o festival Resis de Música Contemporánea e artes relacionadas dará a saída este mesmo mércores 1 de xullo na Fundación Seoane e desenvolverá catro citas presenciais que tamén se emitirán en liña. Marc Vilanova, Noè Rodrigo, Vertixe Sonora e Magdalena Cerezo, conforman a programa que este ano leva o título Algoritmos sonoros.
Ciclos e programas para todo o verán
Todas estas programación ademais veranse complementadas na axenda coa aparición de dúas novas citas cos concertos na Coruña e Vigo. Na cidade olívica a terraza do Auditorio Mar de Vigo acollerá durante todo o verán co ciclo TerraCeo de concertos de artistas nacionais, e incluso actuacións de monologuistas. Na Coruña o auditorio Palexco será o lugar onde durante o mes de xullo se ofrecerán un programa de concertos baixo o cartel O norte non Para, que traerá tamén a figuras do pop e o rock nacional. Ademais diso a Rede Galega de Música ao Vivo volve despois do parón pola corentena, e xa presentou a programación deste circuíto promovido pola Xunta de Galicia a través da Agadic en colaboración con 20 salas de 15 localidades. Son de agardar tamén as actuacións que terán lugar dentro do programa Directos Xacobeo21.
