As feiras do libro retoman a súa actividade con só nove citas

A Federación de Librarías acaba de dar a coñecer o calendario das Feiras do Libro de Galicia para este 2020. Demorado por mor da crise da Covid-19, o circuíto de eventos comeza este ano, como é habitual, en Compostela. Será entre os días 13 e 21 de xuño cando a alameda da capital galega acolla a primeira destas citas, cun pregón inaugural a cargo de María Solar. Co lema "Non contaxian pero enganchan" as feiras desenvolveranse nun total de 9 localidades fronte ás 16 que contaron con estes encontros o pasado ano. Edicións Xerais anunciou xa o seu programa de presentacións para a cita compostelá.

Canda a Compostela unicamente Vigo, entre o 25 de xuño e o 4 de xullo, e mais A Coruña, que se desenvolverá do 1 ao 10 de agosto son as únicas citas que teñen unha duración dunha semana ou superior. De catro días serán as feiras en Ponteareas (9 a 12 de xullo), Redondela (16 a 19 de xullo), Rianxo (23 a 26), Foz (20 a 23 de agosto), Monforte (26 a 29) e Ourense (9 a 12 de outubro). Verín, Ferrol, O Porriño, Celanova, Ribeira, Cambados e Viveiro son as localidades que caen do calendario este ano.

A Feira do Libro Antigo e de Ocasión, pola súa banda, fará escala neste 2020 en Santiago de Compostela (27 de xuño a 12 de xullo), Vigo (18 de xullo a 2 de agosto), A Coruña (14 a 31 de agosto), Lugo (5 a 20 de setembro) e Ourense (22 de setembro a 4 de outubro).