Dúas das torres que forman parte do complexo medieval defensivo da comarca da Limia sufrirán obras de restauración por valor de 160.000 euros. A Consellería de Cultura anunciaba este 27 de maio a licitación dos traballos para "avaliar as posibles deficiencias, corrixir as patoloxías existentes e mellorar o estado de conservación" da Torre do Castro, en Sandiás, e na de Fírbeda ou da Forxa, na Porqueira, dous monumentos que contan con declaración de Ben de Interese Cultural.
De xeito máis específico, a Consellaría apunta que "no caso concreto da Torre do Castro as actuacións contan cun orzamento de 80.000 euros e centraranse no estado actual da cuberta onde é preciso intervir co obxectivo de que este ben poida ser empregado como recurso para o desenvolvemento sostible a promoción socio cultural, laboral e económica da zona", mentres a Torre de Fírbeda ou da Forxa "presenta patoloxías tanto na cuberta como na carpintería ou nas instalacións que fan necesario que se leven a cabo traballos por un importe de preto de 77.000 euros".
