Carlos da Aira e Raquel Lima fanse cos premios Ari(t)mar de poesía

Completadas as votacións populares, os Premios Ari(t)mar Galiza e Portugual deron a coñecer os traballos gañadores na modalidade de poesía. Carlos da Aira fíxose co galardón ao mellor poema galego polo seu traballo Nas noites de luar, mentres Liberdade mais cruel de Raquel Lima foi seleccionada como mellor obra portuguesa. Traballos de Tamara Andrés e Olga Novo foron os segundo e terceiro máis votados entre os textos galegos, mentres Filipa Leal e José Manuel Neves ocuparon estes postos entre os portugueses.


Pola súa banda, o Concello de Arteixo deu a coñecer os premios do vixésimo noveno Certame de narracións breves Manuel Murguía. Silencios náufragos valeulle a Patricia Torrado Queiruga facerse cos 4.000 euros do primeiro premio. Esteban Brea Castro quedou no segundo posto con O último día do Outono mentres Alejandro Mene Pazos foi terceiro co texto A herdeira.

O xurado, composto por Alba Cid Fernández, Daniel Barral Calvo, María Canosa Blanco e Alfredo Ferreiro Salgueiro destacou "a diversidade das obras gañadoras, que construíron propostas sólidas desde diferentes temáticas, xéneros e estilos", ao tempo que advertiu que "tería desexado que moitas das obras contasen cunha corrección lingüística maior e por este motivo chama a atención das persoas participantes para dedicaren, no futuro, a máxima atención no uso da lingua".