O Festiletras celebra unha edición virtual con corenta intervencións

A aposta por manter en liña a programación para o Día das Letras Galegas está a aparecer este ano como unha mostra do que pode ser a axenda cultural en tempos da Covid-19. Propostas clásicas como a do Festiletras, que se celebra na aldea do Couto desde hai 38 edicións, optan tamén por esta opción e reunirá 40 convidas e convidados. Nomes coma Guadi Galego, Marcos Pereiro, Pakolas, Mero, Siro López,Touriñán, Elena Ferro, Xurxo Mariño, Mercedes Peón, Uxía Senlle, Xurxo Souto, Mago Antón, Mini, Carlos Blanco, Isabel Blanco, Bieito Romero ou Quico Cadaval, entre moitas outras persoas, intervirán ao longo da xornada do 17 de maio en vídeo a través da páxina de Facebook da celebración. A organización, no entanto, advirte que mantén para os vindeiros 4 e 5 de setembro a edición física do evento. Ademais, as intervencións en liña complementaranse cunha ofrenda floral, con interpretación do himno e disparo de foguetes, ao pé do monolito pondaliano.

O Consello da Cultura pola súa banda, programa ao longo da fin de semana o lanzamento dunha edición facsimilar de A farsa das zocas con comentarios de Carlos Biscainho. Ademais, este sábado 16 retransmitirase unha lectura dramatizada da peza a cargo de Tito Asorey, Melania Cruz e María Vázquez. Para o día 17, a institución difundirá na rede a estrea absoluta dunha peza musical composta por Miguel Brotóns a partir dun poema de Carballo Calero.

Pola zona da Costa da Morte, segundo nos lembra Que pasa na Costa, outros concellos como Carnota, Zas ou Carballo achegan as súas programacións á rede con contacontos, vídeos emitidos pola cidadanía ou, no caso deste último concello, cunha gala que se emitirá ao vivo. A Banda Municipal de Gaitas e varias formacións co conservatorio local, a compañía Galeatro e Vagalume Animación participan deste programa.

O grupo Onte e Hoxe organizou para esta data tamén unha gala en streaming presentada por Lucía Rodríguez, na que intervirán Francisco Fernández Rei e Carlos Yus a falar sobre Carballo Calero e haberá recitado de poemas ademais dunha actuación musical do propio grupo. Os concellos de Sanxenxo e de Vilagarcía integraron xa esta proposta nas súas propias celebracións da data, esta última localidade ademais programa unha pinchada de música galega para este sábado 16.

En Viveiro as propostas desenvolveranse do día 17 ao 19, cun contacontos de Raquel Queizás, unha reinterpretación do himno a cargo de David Catás, un vídeo dramatizado sobre Carballo Calero e unha conferencia sobre o autor, entre outras propostas. O dúo 2nafronteira, pola súa banda, emitirá tamén, a través das súas redes un concerto co que celebran as Letras e mais o centenario da revista Nós a partir das 21:30 horas.

En Teo tamén haberá unha contada virtual, a dos Contos por teléfono de Rilo e Penadique, que se poderán gozar desde a casa mediante unha videoconferencia con inscrición previa. En Lalín centran a súa actividade ne encontro en liña centrado en Ramón Aller e Varela Buxán, a cargo de Daniel González Alén e Cecilia Doporto, mentres en Boiro programan contacontos, lectura de poemas, presentacións de obras sobre o homenaxeado e diferentes actuacións de centros educativos locais.