Mondoñedo é Poesía celebra de xeito virtual a súa sétima edición

Vinte e catro creadoras e creadores do país participan no evento este 1 de maio

Obrigada pola situación de confinamento, a sétima edición do encontro Mondoñedo é poesía celebrarase a través das redes. Un total de vinte e catro creadoras e creadores, que inclúen poetas e profesionais da música, participan na proposta, que se celebra este 1 de maio e que está dedicado de xeito especial a Luz Pozo Garza, recentemente falecida. A partir das 16 horas sucederanse os recitais nas redes sociais deste evento. Os recitados e as actuacións de música ao vivo estarán acompañados de imaxes coa lembranza dos carteis e publicacións que ilustraron as anteriores edicións da iniciativa.

Iolanda Aldrei, Chus Amieiro, Caxigueiro, Marta Dacosta, Alicia Fernández, Miriam Ferradáns, Antonio García Teijeiro, Montserrat González, Mª Xosé Lamas, Martiño Maseda, Rebeca Maseda, Juan Carlos Mestre, César Morán, Carlos Negro, Olga Novo, Toño Núñez, Lois Pérez, Henrique Rabuñal, Manuel Rivas, Lorena Souto, Paloma Suanzes, Eva Veiga, Eduard Velasco e Ana Vila Portomeñe compoñen a lista de participantes nesta edición.