A VIIª edición dos Premios Martín Códax da Música xa ten finalistas

Un xurado profesional decidiu os 60 proxectos sobre os que se farán agora votacións en liña

Un xurado profesional decidiu os 60 proxectos sobre os que se farán agora votacións en liña
LISTADO DE FINALISTAS 2020
Cincocentas oitenta e unha pospostas de proxectos musicais conformaron este ano o grande abano de candidaturas aos VII Premios Martín Códax da Música organizados desde a Asociación Músicas ao Vivo (MAV). De entre todas esas candidaturas (das que cada ano en Cultura Galega.gal realizamos unha "radiografía da escena musical") un proceso de selección e votación levará a decidir quen levarán os premios, que se entregarán este ano de xeito extraordinario, o vindeiro outono, como case toda a actividade musical do país. Unha das principais novidades desta edición , como xa comentamos cando se presentou, foi a inversión, respecto ás edicións anteriores, do proceso de selección de premiados. Por vez primeira este ano a primeira fase, de selección de finalistas, correu a cargo dun xurado de profesionais diversos, escollendo os 60 proxectos finalistas que agora veñen de ser comunicados pola organización e entre o 20 de abril e o 3 de maio realizarase a segunda rolda de votacións en liña na que as socias e socios de MAV poderán decidir os proxectos premiados, tal como estaba marcado no calendario inicial.

Ata este momento de dar a coñecer os nomes finalistas a composición do xurado foi secreta durante o proceso de votación, mesmo para os propios integrantes do mesmo, ata o día da xornada de deliberación. As cinco persoas que foron as encargadas de decidir estes foron: o saxofonista e mestre musical Xosé Miguélez; Anxela Baltar, cantante, guitarrista e compositora en BALA, traballadora na produción e comunicación en I Wanna Management, é tamén vogal da Asociación MIM; Patricia Cupeiro, doutora en Historia da Arte e da Música pola USC, desenvolve a súa traxectoria profesional vencellada á docencia, á investigación, á xestión cultural e integra varios proxectos de música vocal; a xornalista cultural da Radio Galega Belén Regueira, vencellada a programas de televisión e radio como Chambo ou Extrarradio; Julio Gómez, historiador, crítico musical e investigador sonoro de formación, fundador da promotora e tenda de discos Sinsalaudio, dende o ano 2003 realiza o recoñecido Festival Sinsal.

Segundo se comunica desde MAV, os membros do xurado salientan que foi "un arduo traballo" porque o número de inscritos e inscritas foi "moi alto", pero están moi agradecidas e agradecidos de que desde Músicas ao Vivo tivesen contado con eles para esta tarefa. Comentan que foi "un acerto grande" o feito de se ter engadido nesta sétima edición a categoría de bandas de música, xa que "son imprescindibles", afirman. Ademais, valoran moi positivamente o teren mantido as de verbenas e coros. Sinalan tamén que "hai que facer un esforzo non só para telos representados, senón para implicalos", puntualizan.Desde o sector foron moitos os profesionais que celebraron que o proceso se comezase coa selección previa do xurado para evitar que o resultado final estivese máis motivado pola capacidde de mobilizar votación por motivos persoais, que por criterios de excelencia.