Os concursos de espantallos non son novos no rural galego, dándose noutras localidades como A Lama, Cedeira, Covelo ou Cervo, e utilizándoos como actividades comunitarias ou mesmo coma recursos turísticos, coma a Ruta de Espantallos do Río Barbeira. Neste caso sácase coincidindo co momento de confinamento, o que lle dá valores suplementarios. Desde o Chedeiro piden á veciñanza a súa participación con modelos de espantallo de forma humana, como é tradición, que se exporía ao público cando remate o período de corentena. Á hora de valorar as creacións, un dos aspectos que se terán en conta será a capacidade do creador para resaltar a identidade cultural dunha parroquia de máis de mil anos de historia, segundo informan desde PontevedraViva.com. A actividade, segundo din desde o medio de comunicación local, servirá para afrontar a situación con humor e positivismo así como para engalanar as parcelas cun elemento típico dos campos galegos.