Portada de Bretemada, de Gonzalo López Abente. Fondo: Real Academia Galega / Arquivo de Galicia
A Costa da Morte como paisaxe, como escenario e como fin, e o mar como un motivo recorrente, cargado de imaxes e metáforas. Así era a poesía de Gonzalo López Abente, autor dunha notable obra poética que viu a luz, en gran medida, á súa morte. O autor muxián deixou á RAG unha parte importante de manuscritos e mecanoscritos. Foi a partir deste material do que xurdiron dúas edicións póstumas, unha da propia Academia, que en 1971 editou o poemario Monza de frores bravas para Nosa Señora da Barca e Bretemada, editada por Miro Villar e publicada por Alvarellos en 2011. Agora, a Real Academia Galega completou a dixitalización de todo este fondo, que está accesible en liña no Arquivo de Galicia.
