Confirman que a estatua localizada nunha necrópole de Lugo é de época romana

A sorpresa saltaba hai unhas semanas na excavación de urxencia levada a cabo na rúa da Xesta, en Lugo, como paso previo á construción dun edificio. Nunha necrópole de época baixo romana (séculos III-IV d.C.) aparecía a escultura dun togado, a gran profundidade. As cautelas iniciais ante o achado da estatua, que perdeu a cabeza e que conta cun espigo no pé indicando que debía estar orixinalmente erguida, deron paso á confirmación por parte do arqueólogo da Xunta, Gonzalo Meijide, e a directora do Museo Provincial de Lugo, Aurelia Balseiro, segundo informou La Voz de Galicia. Pero a estatua é anterior ao cementerio. Os arqueólogos estiman que debeu ser elaborada entre o século I e o II d.C. en granito local, e trátase da primeira estatua de vulto redondo máis completa atopada na cidade e, sen dúbida, o gran achado arqueolóxico romano dos últimos anos. O feito de que a estatua sexa bastante anterior ao propio camposanto agocha unha incógnita: "a estatua foi enterrada nese lugar, depositada mesmo con respecto, pero descoñecemos o motivo", indicou Meijide.