Estreando o apartado de exposicións, o MOCA xa ten dispoñible na rede a Iª Mostra de Cine Autobiográfico que baixo o epígrafe Toronto en primeira persoa exhibirá vinte películas persoais de doce autores aliñados co cine experimental, vencellados á comunidade de Toronto, que contan en primeira persoa historias que teñen que ver coa identidade, a memoria, a viaxe, etc. A mostra está comisariada pola investigadora e cineasta Xisela Franco. e comeza con traballos do cineasta canadense Rick Hancox.
En palabras dos seus creadores, a misión de MOCA é "visibilizar o valor de historias persoais en Super8 de xente anónima, e crear, ademais, unha plataforma de exhibición para divulgar a obra de tantos cineastas que traballaron coa historia familiar ou persoal, en calquera soporte, naquilo que veu en chamarse cine autobiográfico, autorreferencial ou cine en primeira persoa". O proxecto é un paso máis no traballo de valorización do cine doméstico que viña facendo La Cinematográfica co apoio de Candelas, desde fai anos, nos que dixitalizou máis de 15.000 metros de película doméstica queirán formando parte da colección do museo virtual. O MOCA ponse como obxectivo atopara e dixitalizar dúas coleccións por ano para seguir traballando sobre o patrimonio audiovisual que representa o cine doméstico.
