A II Edición do Premio SELIC de Poesía foi para Lupe Gómez. Os galardóns que se integran no programa da Semana do Libro de Compostela ficaron desertos nas categorías de teatro e de narrativa, mentres en poesía o xurado seleccionou a a obra Os caracois de Belvís. Como méritos, o fallo destaca a "forma lúcida e delicada, pero non compracente, en que reflexiona, coa vila de Santiago como eixo cordial, sobre os ciclos vitais, imbricando con habelencia o persoal, o comunal e o natural". Sinálase tamén que o texto é "vía de homenaxe e rescate da Compostela máis xenuína e tamén máis relegada: a popular, a dos barrios e leiras, que acaba conducindo a verdadeiras epifanías".
O galardón, dotado con 2.500 euros e a publicación do libro, está organizado polo Concello de Santiago, e a selección correu por conta de Helena Villar, Francisco Macías, Iris Cochón, Eudardo Estévez e Francisco Valeiras.
