Bieito Romero presenta un libro fotográfico sobre simboloxías máxicas

Bieito Romero é músico e líder do grupo musical Luar na Lubre, pero tamén un incansable viaxeiro polo territorio galego. Parte do seu interese pola cultura galega plásmase no seu libro Simboloxía máxica en Galicia que acaba de editar Baía Edicións. Ao longo de 500 fotografías, Bieito Romero documenta símbolos asociados á protección máxica de vivendas, hórreos e construcións do rural, ou igrexas e sitios arqueolóxicos de diferentes épocas. Moitos dos símbolos, segundo o autor, proceden da tradición céltica, xermánica ou cristiá, e o seu uso foi evoluíndo co tempo: "de ser protectoras na maior parte dos casos, derivaron a ornamentais ou decorativas".