A Xunta propón un parador-museo dedicado á romanización en Lugo

O pasado 4 de decembro a Xunta anunciaba que estaba a ultimar "unha proposta integral para impulsar Lugo como referente cultural". Este día 12 o Goberno Galego deu a coñecer o Proxecto integral para o impulso do turismo cultural, no que recolle as propostas coas que pretende que a cidade desenvolva, segundo o conselleiro de Cultura Román Rodríguez, "o seu enorme potencial no ámbito cultural e turístico”.

A principal actuación que anuncia a Consellaría no marco desta iniciativa é a construción dun parador no antigo Cuartel de San Fernando. O espazo, que leva anos a ser reivindicado desde diferentes foros como sede dun Museo da Romanización, pasará a ser, segundo esta proposta, un parador-museo de catro estrelas "cun espazo de musealización in situ que permita difundir o valioso patrimonio achado entre os lucenses e os visitantes". O proxecto, cun custo aproximado de 10,8 millóns de euros conta co compromiso da Xunta para achegar a metade do importe, mentres o resto tería que se completar da man de diferentes institucións.

Ademais, Rodríguez anunciou a instalación no Pazo de Dona Urraca, que a Xunta está a restaurar no barrio da Tinería, da primeira sede do Centro Galego de Arte Contemporánea fóra de Compostela. Segundo adiantou a Xunta, a proposta "acollería exposicións de autores destacados a nivel nacional e internacional e permitiría a difusión de artistas locais, fomentando igualmente a creatividade". De xeito similar, prevese que a Casa-Torre deste mesmo barrio, que tamén está a ser obxecto de rehabilitación, acolla a oficina de turismo da Xunta, ademais da sede da Asociación Provincial de Empresarios de Hostelería de Lugo.

Rodríguez propuxo tamén a creación dunha rede de centros para dar a coñecer o importante legado romano da provincia, que incluiría un reformulado Museo Interactivo da Historia de Lugo (MIHL), de titularidade municipal, o Museo do Castro de Viladonga, en Castro de Rei ademais do propio Cuartel de San Fernando.