O 33 Cineuropa porá os acentos na perspectiva propia da ollada feminina

A 33ª edición de Cineuropa, a primeira na súa historia que non dirixe José Luís Losa, xa deixa ver algunhas diferencias respecto ás anteriores, a primeira é a presentación en dúas diferentes roldas de prensa cunha semana de diferencia. A de hoxe facíase para presentar a nova equipa directiva e debullar as grandes liñas do evento cinematográfico compostelán que comezará o 7 de novembro baixo o lema Cuestión de perspectiva. A responsable de Acción Cultural do Concello de Santiago, Mercedes Rosón, presentou a que será a directora do festival este ano, Laura Seoane, e o coordinador de programación, Javier Trigales. Os dous coruñeses levarán as rendas pola empresa La Tropa Produce. Os tres, acompañados tamén polo director-xerente do Auditorio de Galicia, Xaquín López, presentaron o cartel deste ano, que xa amosa a relevancia da ollada feminina que será a protagonista na sección oficial e terá especial importancia tamén nas seccións paralelas dun xeito transversal en todo o evento. A potencia observada das películas presentadas polas realizadoras na produción actual motivou a necesidade de facer este enfoque para a directora, Laura Seoane, que asegurou que o 40% das películas do programa están dirixidas por mulleres.

Os novos condutores do festival quixeron recoñecer desde o principio a singularidade e éxito do formato tradicional de Cineuropa e aseguraron que a estrutura formal se mantén este ano. Trigales quixo recordar que neste evento “o espectador é o rei”. A programación non está aínda pechada e a vindeira semana, o día 31, coñecerase xa en detalle e por completo, ao mesmo tempo que os destinatarios dos premios de honra. No caso do premio do público a nova dirección multiplica este galardón a un por sección do festival, cinco en total, en troques de ser un único premio cada ano como antes. Ademais esta ano o festival engade unha nova sección de nome Ánimaeuropa que se dedicará ao cine de animación. Mantense na programación a Maratón e haberá ata tres Sesións sorpresa. A falta de dar nomes concretos, coñeceuse que o festival terá varias estreas, algunha delas mundial e outras a nivel estatal ou galego, habituais nun festival que persegue achegar un cine non doado de ver en salas comerciais.

Programa musical paralelo
O director-xerente do Auditorio presentou pola súa banda as actividades paralelas ao festival e que xa poden coñecer a través da web Compostela Cultura, como o Concerto da Banda de Música municipal no Teatro principal dedicado ás comedias de Harold Lloyd e Charles Chaplin e o da Real Filharmonía de Galicia estreando en España a música de J. M. Sánchez-Verdú para acompañar a proxección da película A caída da casa Usher (1928) de Jean Epstein. Ademais tamén quixo encadrar Xaquín López neste programa paralelo o concerto do grupo Los Pilotos e o da actriz e cantante portuguesa María de Medeiros dentro do programa Wom@rts que, xunto a The Legendary Tigerman presentan unha serie de músicas que marcaron a historia do cinema. Será o día 13 de novembro no Auditorio. López ademais comunicou que a venda de entradas para estes espectáculos xa está dispoñible e a de abonos para Cineuropa comezará o día 4 de novembro.