Parásitos faise co premio ao mellor filme do OUFF

O OUFF, Festival Internacional de Cinema de Ourense, fechou o pasado día 5 de outubro as portas a entregar os galardóns da súa vixésimo cuarta xeira. Parásitos, de Bong Joon-Ho, foi a produción que se fixo coa Calpurnia á mellor película, dotada con 18.000 euros. O filme foi tamén recoñecido co premio ao mellor guión. Pola súa banda, o traballo de Alejandro Landes, en Monos valeulle o galardón á mellor dirección, mentres a mellor interpretación foi a de Julianne Nicholson neste mesmo filme.

O que arde de Óliver Laxe, levou cunha mención especial do xurado pola súa "capacidade lírica para denunciar un mundo en extinción" ademais do Premio Galicia. Chicuarotes, de Gael García Bernal obtivo tamén unha mención do xurado e Gaizka Urresti acadou o premio á mellor banda sonora por Aute retrato. O Premio do Público recaeu en La odisea de los giles, de Sebastián Borensztein e Marlén Viñayo recibiu o Premio Cima á mellor cineasta na cita ourensá.

Tamén baixou o pano este día 6 o festival Curtocircuíto. Na cita dedicada aos pequenos formatos All these creatures, de Charles Williams, fíxose co Premio do Público, mentres The Sasha, de María Molina levou o premio Radar e ALTIPLANO, de Malena Szlam o Explora. Brandán Cerviño obtivo o Premio Galicia con En la Boca da Mina e Maddi Barber fíxose co Penínsulas co seu traballo Urpean Lurra. A mellor dirección galega foi a de Lucía Estévez en Arrolo e o mellor guión do país o de Limbo, de Dani Viqueira.