O OUFF presenta o seu programa a se reclamar como referente

Logo de que a Deputación se fixese cargo do evento o pasado mes de agosto, o OUFF, Festival Internacional de Cinema de Ourense, presentaba o seu programa na mañá deste 23 de setembro. A cita, que celebrará entre o 27 de setembro e o 5 de outubro a súa 24 edición, reivindícase "como o festival de referencia do cinema de Galicia". Segundo Manuel Baltar, presidente da Deputación de Ourense, trátase "do único festival de Galicia con sección competitiva en longametraxes" e o único tamén en contar con "exposicións e publicacións de produción propia que completan as actividades paralelas que xunto ás proxeccións a competición e ciclos temáticos conforman o programa".

Entre as principais novidades desta xeira a organización destaca a incorporación de videoclips a competición e mais da ficción televisiva dentro da sección OUFF Transmedia. Ademais, estréase un programa de roteiros que visitarán os escenarios de cine da provincia. No ámbito formativo, apúntase o diálogo entre o director Oliver Laxe e a produtora Emma Lustres, de Vaca Films como un dos principais eventos.

Finalmente, na sección oficial competirán quince longametraxes. La odisea de los giles, Los consejos de Alice, Nuestras madres, Parásitos, Retrato de una mujer en llamas, Cachada: The Opportunity, Monos, O que arde de Óliver Laxe, La hija de un ladrón, Chicuarotes, El doble más quince e The Bra foron as seleccionadas entre cincocentas propostas a concurso.

Na sección OFF en Curto competirán 17 curtas e nove videoclips, mentres Fas Muvis promoverá a creación de pezas audiovisuais contrarreloxo. Unha retrospectiva de cinema mexicano, o programa OUFF Escola, obradoiros e as exposicións Filmado en Ourense. Sempre Xonxa.Chano Piñeiro. 1989-2019, O intimismo da rodaxe de Elisa e Marcela e mais Memoria erótica de Xurxo Oro Claro completan a proposta.