Un obradoiro de creación escénica a cargo de Ibuprofeno Teatro servirá de aperitvo, entre os días 12 e 14 de agosto, á XL xeira da Mostra de Teatro Galego de Cariño. A cita decana da escena do país presenta un programa no que, como é habitual, conflúen moitas das novidades que pisarán as táboas galegas ao longo da vindeira temporada. Barafunda animación abrirá o programa o vindeiro día 16 co espectáculo de Rúa Percebes de Ortegal. Ata o 22, pasarán polos escenarios da vila propostas como as de Teatro Ghazafelhos e A Illa Sen Tesouro, A compañeira de piso de Contraproducións, Patapatúm de Elefante Elegante, Mai Mai de Baobab Teatro ou Bernarda (Vilalba, 1975) de Malasombra Producións entre outras.
