A Mostra de Ribadavia aposta polo "teatro documento" na súa 35ª edición

A Mostra Internacional de Teatro de Ribadavia celebra a súa 35ª edición apostando con forza polo teatro documento máis apegado a actualidade social de carácter universal. Máis de vinte espectáculos entre os de produción galega e os chegados de México, Francia ou Arxentina, ademais de varias comunidades autónomas conforman o cartel para os dez días da MIT na localidade ourensá. Entre eles estará a agardada estrea de Curva España da compañía Chévere Teatro. As liñas mestras que guían a ambiciosa programación internacional son formalmente as do teatro documento, o teatro físico e o novo circo, mentres que nos niveis conceptuais a construción da identidade, da masculinidade, a violencia exercida contra a muller e os dereitos humanos son as temáticas que percorren a oferta teatral presentada este ano. Desmarcándose dunha proposta enfocada á consecución de publico indiscriminada desde a MIT defenden que o teatro non obedece ás regras do mercado e da industria, non debe estar exposto ás leis do consumo. "As leis do teatro non son as do mercado, porque o teatro non é industria" advirten na súa presentación deste ano.

A inauguración correrá a cargo da compañía arxentina Un poyo Rojo, que presenta un espectáculo que se poderá ver este verán en Ribadavia, no festival de Edimburgo, na Bienal de Venecia ou no festival de Almada. Un poyo rojo trata dende as técnicas do teatro físico e da danza o tema das novas masculinidades, cuestión que tamén aborda o espectáculo inTarsi, da compañía de circo "eia". A clausura do festival será o día 27 de xullo, co espectáculo Hemos venido a darlo todo de Voadora, dentro da Igrexa da Madalena. Será despois de Jauría, estrea en Galicia do espectáculo protagonizado pola actriz María Hervás. Dramaturxia a partir das transcricións do xuízo realizado a La Manada, construído con fragmentos das declaracións de acusados e denunciante publicadas en varios medios de comunicación. Unha ficción documental a partir dun material moi real dun caso que remove de novo o concepto de masculinidade e a súa relación co sexo da nosa sociedade. Ao lado de estreas, a MIT presenta espectáculos premiados e recoñecidos como A.K.A., que chega de Barcelona con 2 Premios Max, 4 Premios Butaca ou 3 Premios Teatro Barcelona. Na rúa tamén haberá espectáculos moi destacables como Mulïer, dos valencianos Maduixa (4 Premios das Artes Escénicas valencianas, 2 Premios Max ou o Deventer Award). O programa inclúe un curso de Teatro Documento imparitdo pola mexicana Alícia Laguna, de Teatro Línea de Sombra, e no que tamén participarán Marían Bañobre e Santiago Cortegoso, de Ibuprofeno Teatro.