A Mostra Internacional de Teatro Cómico de Cangas acollerá cinco estreas absolutas

A XXXVI edición da Mostra de Teatro Cómico e Festivo de Cangas comezará o vindeiro 28 de xuño co pregón de apertura de Quico Cadaval, actor, dramaturgo e director. O Auditorio Municipal, as rúas e outros espazos acollerán máis de vinte espectáculos durante os nove días deste encontro que pon a vila de Cangas no centro da atención teatral de Galicia e o resto do Estado. A MITCFC acollerá este ano cinco estreas absolutas, obras que se poderán ver en Cangas por primeira vez en todo o mundo: A Illa das Matriarcas, unha coprodución galego inglesa das compañías Aporia Escénica e Theatre of Ancients; Crunch, unha coprodución da compañía galega Muuu e da propia Mostra; La Gran Ofensa, de la Bendita Compañia e El Terrat (Cataluña), Proxecto Cuco. Cultura contra o cambio climático, outra coprodución da MITCFC con Teatro Tío Teixo; e C’est pas possible, de Sempre Arriba coproducida pola Mostra. Ademais, o público poderá ver cinco estreas en Galicia de obras como Comedia Aquilana, de Nao de Amores & Cia (Castela e León); Donna Quixota, de Pina Polar (Polonia); La mujer perdida, da compañía asturiana Teatro del Norte; El desguace de las musas, de La Zaranda; e Tentación Divina, da compañía Artlequín (Arxentina/España). Este ano ademais, por vez primeira, a naviera Mar de Ons porá en marcha un servizo especial nocturno de barcos entre Cangas e Vigo durante as fins de semana que dura o evento desde as oo:30 horas aata as 02:00 horas.

Cadaval tamén actuará nesta edición da Mostra co espectáculo Vacas, Guerras, Porcos e Cregos, da compañía Producións Excéntricas, que actualmente dirixe e da que tamén se programa na XXXVI MITCFC a obra Carpe Diem. Dentro da parte formativa que sempre hai no programa da MITCFC directoras de Teatro en Vilo, Andrea Jiménez, Noemí Rodríguez, impartirán un obradoiro sobre A dramaturxia actoral e os procesos de creacion colectiva na Casa de Cultura de Cangas, entre os días 3 e 5 de xullo. A Mostra chegará ao seu fin, o sábado 6 de xullo, coa obra de coprodución angloespañola Generación Why, de Teatro en Vilo, compañía que en 2016 recibiu o Premio do Público da Mostra de Cangas coa representación de “Interrupted”, o seu primeiro espectáculo.

Catro contendentes competiran no Torneo de dramaturxia
O Torneo de Dramaturxia de Galicia consolídase como unha aposta firme da MITCFC para dar a coñecer a nosa dramaturxia, creando un nexo directo entre autoras/es e público. Este proxecto, pioneiro en Galicia e que este año chega á súa terceira edición, conta coa imprescindible colaboración de DramaturGA, a primeira asociación profesional da dramaturxia galega. No III Torneo de Dramaturxia, haberá unha mestra de cerimonias única, nesta edición Esther F. Carrodeguas, que presentará este furioso combate no que catro recoñecidas dramaturGAS e dramaturGOS de Galicia se baterán na procura do voto do público. O público asistirá a catro lecturas dramatizadas, interpretadas por actrices e actores profesionais de recoñecido prestixio, e será o propio público quen vote os textos que máis lles teñan gustado para que, de entre as catro pezas participantes, resulte unha soa a gañadora. Carmen Conde, Ana Carreira, Fran Godón e Zé Paredes serán os intérpretes, que estarán acompañados polo pianista Velpister.