The Widow, de Noelia Muíño, álzase como triunfadora en Cans

O festival audiovisual fechou sábado a súa XVI edición

Con tres galardóns, os de mellor guión, mellor realización e mellor dirección de fotografía para Asia Khmelova, a curta The Widow, de Noelia Muíño, revelouse como a grande triunfadora do último Festival de Cans. O encontro audiovisual da aldea porriñesa fechaba na noite de sábado a súa décima sexta xeira cunha entrega de premios na que tamén destacou Limbo, de Dani Viqueira, filme que obtivo os recoñecementos á mellor curtametraxe de imaxe real e á mellor banda sonora orixinal para Germán Díaz.

En animación impúxose Soy una tumba, de Khris Cembe, e o xurado entregou unha mención especial a Homomaquia, de David Fidalgo Omil. A mellor interpretación feminina foi a de Marta Nieto en De repente la noche mentres Jaime Olías levou o premio a mellor actor polo seu traballo en O que medra por dentro.

Devalar, de Mar García, fíxose co premio á mellor curtametraxe de FuraCans, e Caerán lóstregos do ceo, de Adrián Canoura, obtivo unha mención especial na categoría de non ficción. O xurado de videoclips recoñeceu Visión, dirixido por Peque Varela para o grupo Window Pane, e deu unha mención a Gris dirixido por Xaime Miranda para o grupo Basanta.

O xurado dos veciños e veciñas, pola súa banda, entregaron o premio á Mellor curtametraxe de imaxe real a O que precede á caída é branco, de Aldara Pagán, e concederon a súa mención especial a De repente la noche, de Cristina Bodelón e Ignacio de Vicente.