O gasto en cultura por habitante en Galicia minguou durante 2017

Os 242,3 euros de media sitúannos como terceira comunidade que menos gasta por cabeza

Cada persoa realizou en Galicia un gasto medio de 242,3 euros durante 2017, fronte aos 258,4 que investiu en 2016. Cando menos, así o asegura o Anuario de Estatísticas Culturais que acaba de facer público o Ministerio de Cultura. A cifra sitúanos na terceira posición polo final a nivel do gasto individual neste campo en todo o Estado, só por riba de Castela-A Mancha e Estremadura. No gasto medio por familia, os 597,2 euros investidos déixannos no segundo posto pola cola, só por diante de Estremadura.

Do mesmo xeito, diminuíu o gasto total nestes elementos, con só 650.800 investidos por particulares neste ámbito fronte aos 696.500 de 2017, o que supón un gasto medio por fogar de 597,2 euros fronte aos 640,6 do anterior exercicio. Destes, o groso do gasto, un 40,3 por cento faise en servizos de telefonía móbil e Internet, seguido polos 26,8 por cento que se destina a Soportes, equipos e accesorios audiovisuais e de tratamento da información. Os libros e as publicacións periódicas, cun 20,2 por cento do gasto sitúanse na terceira posición.

Fronte a isto, no período estudado medrou o número de empresas de carácter cultural, que pasou de 6.252 a 6.397. Destas, a maior parte, 2.069 aparecen adscritas a Actividades de deseño, creación, artísticas e de espectáculos. O crecemento, no entanto, acompásase coas cifras a nivel estatal, polo que as nosa comunidade supoñen o 5,4 do total destas empresas no Estado, unha porcentaxe que sitúa o noso país en quinto neste índice, por detrás de Madrid, Barcelona, Andalucía e Valencia.

Ao tempo, o informe cifra o gasto liquidado en cultura pola Administración Autonómica durante 2016 en 72.686.000 millóns de euros, o que supón unha mingua do 0,15 ao 0,12 do PIB do país e deixa o gasto por habitante en 26,7 fronte aos 30,5 do anterior ano.