Intervención de Eduardo Basualdo en Bacelos Madrid.
Logo de dezaoito anos de actividade e coa admisión para ARCO deste ano xa fechada, a galería Bacelos de Vigo anuncia o seu feche. As dificultades económicas finalizan o proxecto que lideraba Pepa Gómez Montesinos e que chegou a ser un referente galego neste campo, cunha importante presenza en feiras internacionais. Foi ademais a primeira galería do noso país que abriu, en 2012, unha delegación en Madrid, espazo que tamén fecha as súas portas. A seguir a liña de conexións entre creadores locais e internacionais que promovía desde Bacelos, Gómez Montesinos anuncia a posta en marcha dun novo proxecto, Charco, que quere promover o intercambio entre artistas das dúas bandas do Atlántico, segundo informa La Voz de Galicia.
