A AELG recoñece a Maria Teresa Horta como Escritora Galega Universal

Dorothé Schubart e Pablo Quintana foron declarados Mestres da Memoria e Pilar Pallarés recibirá a homenaxe Escritor na súa terra

Imaxe do Facebook de María Teresa Horta
Imaxe do Facebook de María Teresa Horta
A Asociación de Escritores/as en Lingua Galega acordou na asemblea que desenvolveu o pasado sábado, outorgar os seus galardóns anuais. Deste xeito, as socias e socios declararon a Maria Teresa Horta como Escritora Galega Universal 2019, "desde o profundo respecto e afecto á súa persoa e a valoración da altísima calidade literaria da súa obra, así como pola súa incontestábel defensa feminista dos dereitos civís, sociais e culturais na sociedade portuguesa actual". Pilar Pallarés, pola súa banda, será a vindeira galardoada coa homenaxe Escritor na súa Terra – Letra E, nun evento que se desenvolverá na Coruña o vindeiro mes de xuño.



Pola súa banda, e a iniciativa da Sección de Literatura Oral, os recoñecementos de Mestra e Mestre da Memoria 2019 foron a Dorothé Schubart e a Pablo Quintana, que recibirán os seus galardóns na IV Gala dos Premios Mestras e Mestres da Memoria que se desenvolverán en Lugo.

Ademais dos galardóns, a asemblea acordou incorporar a Cilha Lourenço, Daniel Asorey e Xoán Carlos Domínguez Alberte ao Consello Directivo da AELG e aprobou o programa de actividades para o ano, que inclúe como citas máis próximas a celebración do Día de Rosalía o 24 de febreiro e o Parlamento de Escritoras/es que se desenvolverá o 15 e o 16 de marzo.