Doce festivais galegos entre os finalistas dos premios Iberian Festival 2019

O vindeiro 13 de marzo nunha gala en Vigo coñeceranse os gañadores dos IV premios Iberian Fest, que premian os mellores eventos do pasado ano que se celebraron en toda a península ibérica. Os doce festivais galegos que presentaron a súa candidatura conseguiron pasar a fase inicial e estar presentes entre os 10 finalistas en unha ou varias das categorías nas que se presentaron. A organización ven de dar a lista desas 10 que en cada caso superaron o corte das votacións populares ou do xurado de profesionais e entre as que xa está a gañadora, malia que aínda non se coñeza.

As pasadas edicións do Resurrection Fest e de O Son do Camiño, son as representantes galegas que máis aparecen, con catro postos finalistas cada unha delas. No caso do "Resu" é a única representación galega na categoría de Grandes Festivais e de Mellor comunicación, mentres que compite tamén con O Son do Camiño na categoría de Mellor cartel artístico. Este último opta tamén a 2 premios polo concertó dado por Lenny Kravitz no Monte do Gozo e outro como Mellor Novo festival, categoría na que coincide coa primeira edición do Caudal Fest de Lugo. O WOS festival, de Santiago, que ven de ser recoñecido nos European Festival Awards como mellor evento musical baixo teito, é finalista aquí nesa mesma categoría ademais de na de Mellor Promoción Turística. Os outros festivais que acadan un posto nalgunha categoría entre os 10 finalistas elixidos, xa sexa por votación populares xa sexa por un xurado especializado, son, con dous postos finalistas, o FIV de Vilalba; Sinsal Son Estrella Galicia; Super Bock Under fest de Vigo (as dúas pola actuación de Benjamin Clementine). Con un posto entre os 10 dalgunha categoría están tamén o Portamérica; Atlantic Fest; SonRías Baixas; 17• Ribeira Sacra e o festival de Os Eidos no premio a Festivais non-musicais. Ademais tamén aparece entre os finalistas elixidos polos xurados a marca Fest Galicia, impulsada pola Agadic e que opta á Mellor Activación de Marca.

O futuro de O Marisquiño nun brete
Noutra orde de cousas hoxe se coñeceu que un dos festivais multidisciplinares, o festival de cultura urbana O Marisquiño de Vigo o futuro está cheo de incertezas. O que foi "alma mater" e director ata agora deste multitudinario evento, Carlos Domínguez "Pity", ven de abandonar a organización para centrarse no resto das súas actividades empresariais. A desgraza ocorrida o pasado verán durante a celebración, sumada á falta dun apoio económico das administracións a este evento, nomeadamente a Xunta de Galicia, conseguiron desanimar ao seu fundador que agora deixa nas mans dun dos seus colaboradores a posibilidade de levar a cabo unha nova edición se resulta economicamente viable, extremo que aínda está por confirmar nas vindeiras semanas.