O Consello da Cultura aborda problemas da actualidade co ciclo Pensarmos

Da man da súa Sección de Pensamento, o Consello da Cultura Galega inicia este xoves 24 de xaneiro o seu novo ciclo Pensarmos. Esta proposta de charlas, debates e intercambio de ideas pretende abordar os problemas da actualidade. Posverdade, fascismos dixitais, tecnopersoas, precarización da vida ou perda de liberdades son algúns dos temas que se abordarán nas sesións que se desenvolverán o último xoves de cada mes na sede da institución en Santiago de Compostela.

O filósofo Javier Echeverría é o responsable de botar a andar este programa o vindeiro 24 de xaneiro coa súa intervención Entre cavernas: tecnopersoas e tecnomundos. Carme Adán, coordinadora da sección de pensamento, conversará con este investigador especializado no Terceiro Entorno, o mundo que se constrúe a través de Internet. Echeverría ten publicadas 20 obras monográficas, é autor máis dun certo de artigos en revistas e libros internacionais e dirixiu 18 teses de doutoramento.

Despois de Echevarría, pasarán por este foro Lluís Bassets (28 de febreiro), Garteh Williams (28 de marzo), Remedios Zafra (25 de abril) e Antonio Cuña (23 de maio).