Os Centros de Estudos Galegos promocionarán o Xacobeo a nivel internacional

A Cidade da Cultura acolle os vindeiros 14 e 15 de decembro o I Simposio Internacional Os estudos galegos camiño do Xacobeo 21. Este encontro, organizado pola Consellería de Cultura e Turismo a través da Secretaría Xeral de Política Lingüística, da Axencia de Turismo de Galicia e da Sociedade de Xestión do Plan Xacobeo, quere desenvolver o papel dos Centros de Estudos Galegos en diferentes universidades do exterior como axentes de promoción do vindeiro Xacobeo. Segundo destacou o dirextor xeral de Política Lingüística, Valentín García, "trátase da primeira edición dun simposio que suporá un foro de debate internacional e encontro desde os Centros de Estudos Galegos (CEG) dependentes da Consellería de Cultura e Turismo, así como doutras entidades colaboradoras, tamén desde o exterior, que funcionan como motores de difusión da nosa lingua e cultura propias".

Segundo adianta a presentación desta inciativa, os obxectivos do simposio son "establecer as liñas comúns de actuación cara a difusión do Xacobeo do ano 2021 e as accións que se realizarán durante o tempo que queda para a súa celebración". Ao tempo, o encontro "pretende recoller as achegas que, dende a experiencia, os diversos CEG fan a respecto da promoción do Xacobeo en cada un dos países onde operan". Con este iniciativa, engade, "iníciase un proceso de creación de materiais específicos para cada un dos lugares de onde proveñen e que teñen como finalidade a promoción do Camiño de Santiago, o Xacobeo e Galicia". Por outra banda, designaranse como "Prescritores" os "membros dos centros ou o seu persoal colaborador, se for o caso", segundo adianta a presentación do evento.

No programa intervirán reponsables de centros en diferentes universidades do mundo, con mesas como "A experiencia da promoción do Camiño dende os Centros de Estudos Galegos". Canda a esta, haberá relatorios sobre "Presenza da cultura e a lingua do Camiño", "Proxección da música na cultura galega", ou "Peregrinación e feito xacobeo" entre outros contidos.