A Coruña está a celebrar desde o pasado venres 12 o 192 aniversario da batalla de Elviña, na que os exércitos inglés e francés loitaron polo dominio da cidade na Guerra da Independencia. Os actos, organizados pola asociación Histórico Cultural "The Royal Green Jackets" coa colaboración do Concello incluíron a reconstrucción da batalla que se realizou onte.
Conferencias e actos
A celebración do aniversario comezou o venres cunha conferencai de Xerardo Fernández Albor que puxo en relación a batalla coa construcción da Unión Europea. Hoxe mesmo o alcalde Francisco Vázquez, acompañado do embaixador de Francia e membros dos corpos diplomáticos francés e inglés inaugurarán un mural de baldosas sobre a batalla. Vázquez tamén asistirá á presentación dunha biografía de Sir John Moore realizada por Mark Zhigniew Guscin e realzará unha ofrenda floral ante o monolito dedicado ó mariscal francés Soult. Onte realizouse un percorrido turístico polos puntos históricos da cidade recollidos no tríptico "A Coruña de Sir John Moore" e realizouse un desfile do 4º Rexemento de Artillería. Os actos rematarán mañá cunha ofrenta floral ante o mausoleo do xeneral inglés Sir John Moore, que pereceu no combate.
Reconstrucción histórica
Un dos actos máis destacados desta celebración foi a reconstrucción histórica que se realizou onte na cidade, como ven sendo habitual desde hai dous anos. organizada por "The Royal Green Jackets" é a primera reconstrucción deste tipo que se realiza no Estado, aínda que noutros países europeos xa contan cunha grande tradición. O encontro das tropas dos dous exércitos produciuse onte nos xardíns de Carlos I, con ruidosas salvas de fusilería que sorprenderon ós habitantes da cidade. Tamén a praza de María Pita foi testemuña dun combate no que mesmo houbo presencia de pezas de artillería. A vistosidade dos uniformes, reconstrucción exacta dos da época e o emprego de réplicas reais das armas empregadas na batalla engadíu un elemento de espectacularidade que atraíu un numeroso público.
