A Deputación da Coruña crea un novo foro sobre normalización lingüística

O vindeiro 23 de outubro o Pazo de Mariñán acolle a primeira das xornadas Malas Linguas. Esta nova iniciativa da Deputación da Coruña comprenderá catro sesións, entre outubro e abril, nas que se abordarán diferentes ámbitos da problemática do galego no noso país. A sesión inaugural, centrada no eixe Lingua, discurso e políticas públicas, contará con intervencións como as de Nel Vidal, Marcos Maceiras, Rosa Berrio, Jasone Mendizábal ou Tina Formoso.

O proxecto continuará o día 29 de novembro na Coruña, cunha sesión dedicada a Lingua e memoria. Xa no vindeiro ano, en Compostela abordarase a Transmisión non familiar lingua o 1 de marzo, mentres A Coruña acollerá o 12 de abril unha nova sesión centrada en Lingua e xéneros. O prazo de inscrición para estes encontros está xa aberto.

A iniciativa, orientada principalmente a persoas que traballan no ámbito da normalización e das políticas públicas, parte da base de que "o galego precisa redefinir a súa folla de ruta para activar falantes no século XXI", segundo explica a presentación do proxecto. "Para contribuír a ela, a Deputación da Coruña organiza as xornadas Malas linguas, unha oportunidade para facer diagnose, analizar a situación actual e, desde aí, trazar, imaxinar e coller folgos para continuar o camiño da normalización lingüística do galego", sinala.