As xornadas Tempo do óxido recuperan a memoria da reconversión naval

Rock, Rebeldía e Reconversión. Tempo do óxido, é o título das xornadas coas que a Coruña recuperará, entre o 10 e o 14 de xuño, a memoria dos tempos da reconversión naval da cidade nos anos 80. Segundo explicaba onte o concelleiro de Cultura, Xosé Manuel Sande, na presentación da iniciativa, o programa "bota unha ollada a través da memoria dos protagonistas á primeira época da democracia, na que a sociedade esixía outra información e outra diversión é na que máis que sectores produtivos se derrubaban xeitos de entender o traballo". A conexión entre a crise laboral e a cultura da época, nomeadamente a música, serve como fío condutor para as actividades do programa.

Promovidas polo xornalista e antigo líder de Radio Océano, Xosé Manuel Pereiro, as xornadas iniciaranse cun roteiro a pé por espazos relevantes da produción musical da época na cidade, como bares e locais de ensaio. O día 11 abrirase a exposición A realidade reflectida na Fundación Luís Seoane, que repasa a través de fotografías e publicacións o xeito no que os medios recolleron os acontecementos sociais e culturais do momento. O mesmo lugar acollerá entre os días 12 e 14 os coloquios, que comezarán con Suso Díaz, Rafael Pillado e Carlos Neira, líderes sindicais da reconversión naval para falar sobre a reconversión naval e seguirán o día trece a abordar a produción musical do momento da man Jesús Ordovás, Nonito Pereira e Carlos Galán. Finalmente, Xosé Gaciño, Manuel Rivas e María Xosé Porteiro lembrarán a pegada daqueles acontecementos nos medios de comunicación o día 14. Cada unha destas mesas rematarán cunha sesión DJ a cargo dos participantes.

A proposta enmárcase nas diferentes actividades que o Concello da Coruña está a desenvolver arredor da memoria colectiva da cidade, con propostas como A caixa da memoria ou Xeografía, memoria e capital cívico entre outras.