O Mapa Literario de Vigo convida a percorrer a cidade a través dos libros

A coincidir coa celebración do Día do Libro, a Biblioteca Municipal Xosé Neira Vilas presentaba o Mapa Literario de Vigo. A proposta, accesible vía web, achega un mapa similar ao do metro no que cada parada física da cidade se corresponde con obras literarias que teñen pasaxes ambientados na mesma. En total, medio centro de obras conforman un mapa que pon de relevo barrios e lugares da memoria da cidade.

"Lugares coma a Porta do Sol co Sireno como testemuña de moitos acontecementos das nosas vidas e das historias de ficción ou ficcionadas que recollen estas obras, ou o barrio de Teis como testemuña directa dunha xeración perdida e das revoltas obreiras, o Berbés coma recordo das tradicións viguesas, as cales designan en moitos casos os nomes das rúas e as prazas ata o alto do Casco Vello ou o Calvario como reflexo de unión entre a veciñanza" son algúns dos espazos que se recollen nesta iniciativa, segundo recolle o seu web. O espazo na rede permite ademais no navegar a partir das obras e dos lugares recollidos. O mapa está aberto a novas colaboracións que completen as rutas e acheguen novas obras do conxunto.