Coa inauguración da exposición Xulio Verne. Os límites da imaxinación nas dependencia do Museo de Arte Contemporánea de Vigo (MARCO) comezou onte de facto a nova etapa desta institución artística, unha etapa marcada pola ausencia de dirección do centro e de proxecto propio ligado á arte contemporánea. A exposición da Fundación Telefónica chega á cidade tras o seu paso por Madrid, Arxentina e Avilés, para ocupar as salas do MARCO ata o vindeiro 16 de setembro. Tal e como recolle o xornal La Voz de Galicia o acto de inauguración non estivo desprovisto de tensión ao verse o alcalde da cidade, Abel Caballero, interpelado por un socio da Agrupación de Amigos do MARCO e existir protestas por parte de membros do colectivo MARCO Así NON, contrarios todos eles á xestión que desde a alcaldía se está a facer da institución artística .
A exposición serve para conmemorar dous dos feitos que relacionan ao escritor francés coa cidade, un deles ficional e outro real. No 2018 fanse os 150 anos da entrada do Nautilus do capitán Nemo na ría de Vigo que se relata na novela Vinte mil leguas baixo dos mares, e 140 anos da primeira visita de Jules Verne a Vigo. Por estas efemérides a exposición incluirá contidos especialmente relacionados, grazas ao asesoramento de Eduardo Rolland. Así, a sección Mobilis in mobili mostra, por primeira vez de xeito conxunto, pezas únicas vencelladas á figura do escritor francés cedidas por museos e coleccións particulares de Galicia, dende unha maqueta do navío Saint Michel III ata gravados holandeses da Batalla deRande, e pezas orixinais de traxes de mergullador do século XIX. Durante a súa estadía en Vigo, a exposición estará acompañada dun conxunto de actividades paralelas —percorridos guiados, charlas e mesas redondas, e unha mostra bibliográfica na Biblioteca-Centro de documentación, entre outras— ademais dun programa para escolares de todos os ciclos educativos.
