As primeiras biografías de María Victoria Moreno chegan ás librarías

Xa comezan a aparecer as primeiras biografías da mestra e escritora María Victoria Moreno, a quen se lle adica este 2018 o Día das Letras Galegas. Marilar Aleixandre e Fina Casalderrey asinan en Xerais a biografía María Victoria Moreno. A muller que durmía pouco e soñaba moito, un retrato próximo á autora que, en palabras da editorial, "reconstrúe con emoción toda unha vida de novela dedicada ao amor aos libros e a comunicar o pracer pola lectura en galego, lingua coa que mantivo unha historia de amor". Tamén en Galaxia, Montse Pena publica A voz insurrecta, outra biografía sobre a autora da que se destaca na presentación editorial "a súa procedencia estremeña e a capacidade de asumir o galego como lingua propia, a entrega constante nas aulas e o compromiso adquirido coa literatura infantil e xuvenil galega, aínda incipiente cando comeza a escribir".