O DOG inclúe a delimitación do ben e integra como novidade tres manifestacións do patrimonio inmaterial como son as festas de fachas e fachós de Castro Caldelas, Vilelos e Castelo; as festas do Entroido Ribeirao de Santiago de Arriba, o Oso de Salcedo e os Felos de Esgos; e a olaría tradicional de Gundivós e Niñodaguia. Ademais, dentro patrimonio inmoble, o expediente contempla a declaración como BIC de elementos individuais como son as Adegas de Vilachá, a Cidadela de Santa María, a Igrexa de Santa María de Temes, a Capela do poboado dos Peares, o Mosteiro e igrexa de San Paio de Abeleda, a Igrexa de Santa María de Nogueira de Miño, a Subestación do encoro de Belesar, o Mosteiro e igrexa de San Salvador de Asma, o Pazo de Tor, a Capela da Virxe de Guadalupe, a Igrexa de Santa María de Seteventos, a Igrexa e reitoral de San Vicente de Pombeiro, a Fábrica da Luz do río Mao, a Necrópole de San Vítor de Barxacova, o Mosteiro e igrexa de San Xoán de Loio, o Poboado dos Covallos de Montefurado, o Túnel e explotacións mineiras de Montefurado e mais os Muíños do río Xabrega. Canda a estes, outros espazos xa recoñecidos como BIC verán modificados as súas áreas de protección.
Ábrese agora un período de tres meses desde a data de publicación para presentar alegacións a este proxecto. Con posterioridade, continuarase coa tramitación do expediente que, segundo anunciou o conselleiro de Cultura, Román Rodríguez, se prevé ter rematado de xeito definitivo para o final de 2018.