O Festival Internacional Cinema Crianza dá os seus primeiros pasos

A primeira edición do Festival Internacional de Cine Infantil Cinema Crianza de Ames está a piques de abrir as súas portas esta semana. Este singular evento reunirá durante tres días o formato dun festival audiovisual de carácter competitivo co da animación infantil a través do xénero cinematográfico dirixido aos máis cativos e que non sempre é ben recollido noutros eventos do cine, ademais a celebración neste concello non é casual xa que é o que amosa un maior índice de natalidade. O Cinema Crianza contará con 31 sesións nas que se poderán ver 70 curtametraxes a concurso, filmes, documentais, música e unha sesión para preadolescentes. O certame durará tres días, do 15 ao 17 de decembro, e celebrarase nas Casas da Cultura do Milladoiro e Bertamiráns (Concello de Ames).

O festival conta coa dirección artística de Marcos Nine e está coordinado por Cristina Fiaño. Posto que o fío condutor do primeiro Cinema Crianza son as viaxes, o programa está concibido como un tren que percorrerá "terras de lume e de xeo, cruzará os mares e tamén o ceo, pois o noso tren é quen de atravesar calquera terreo". As curtametraxes estarán agrupadas en sesións, atendendo á temática dos filmes, así como á idade recomendada dos mesmos. O tren imaxinario do Cinema Crianza irá deixando pasaxeiros nestas diferentes "paradas" (as sesións). O festival dará a benvida cunha sesión para pequenos e maiores na que se proxectarán traballos de Lotte Reiniger. Esta cineasta alemá, que comezou a súa carreira aló polo 1916, foi pioneira no arte do cine de animación mediante personaxes de siluetas e o xogo con luces e sombras. De Reiniger poderase ver unha escolma de contos clásicos, como Cincenta e Pulgariña.

Boa parte das sesións conteñen curtametraxes a concurso. Durante os meses de agosto a outubro, o Cinema Crianza abriu un concurso internacional que acadou un grande éxito. Das miles de pezas recibidas dende os cinco continentes, seleccionáronse 70 curtametraxes que competirán na sección "Axóuxeres", pezas para nenos ata 3 anos, e "Buxainas", para rapaces de máis de 3 anos. Todas elas foran seleccionadas polo seu potencial para fomentar nos nenos e mozas o espírito crítico sobre temas sociais ou culturais e de cultivar o seu criterio audiovisual, ofrecendo primeiras experiencias diversas e de calidade.

Unha das sesións máis especiais do Cinema Crianza é "Metamorfoses", unha parada para maiores de 12 anos ou para adultos que queiran achegarse a confitos que se rexistran cando se aproxima a adolescencia. Metamorfoses retrata sentimentos e problemas a través de seis curtametraxes que xiran arredor da idade máis transcendental das nosas vidas. Ademais de curtas, tamén se poderá asistir á proxección de cinco películas: A casa da luz, Dwa Swiaty, (Dous mundos), Auf Augenhöhe (A nivel dos ollos), Ce n'est qu'un debut (Só é o comezo) e Minúsculos: o val das formigas perdidas.

Non só cine

Coa finalidade de amosar produción cinematográfica feita en Galicia, ademais das curtas galegas a concurso e a longametraxe dirixida por Carlos Amil A casa da luz, o Cinema Crianza tamén contará con dúas sesións elaboradas con curtas da produtora OQO filmes e unha escolma feita con pezas do programa educativo Cinema en curso seleccionadas pola súa directora. Ademais, o festival contará tamén con dúas sesións nas que a música terá un papel fundamental, pois estará composta por unha selección de vídeos musicais de artistas recoñecidos da música infantil galega entre os que atopamos nomes tan coñecidos por tódolos cativos como Paco Nogueiras, María Fumaça ou Magín Blanco, a quen se lle adicará unha sesión específica.