O premio Blanco Amor fica deserto por primeira vez na historia

O Premio Blanco Amor de Novela Longa quedou deserto na súa XXXVI edición. Por vez primeira na historia deste galardón, un dos máis destacados da narrativa do país, o xurado decidiu que ningún dos vinte orixinais que se presentaran ao certame era merecente de se facer coa vitoria. Luís González Tosar, Alba Cid, Xosé Carlos Caneiro, César Lorenzo Gil e Montse Pena Presas foron os responsables da decisión. O premio, dotado con 12.000 euros e a publicación do libro, naceu da man dunha agrupación do concello do país e está organizado desde o ano 2014 pola Deputación de Ourense.

Pola súa banda, o XV Certame de Microrrelatos que organiza a Lonxa Literaria de Moaña foi para Emma Pedreira polo seu texto Lelalela. O premio, dotado cun lote de conservas da ría, entregarase o vindeiro mes de xaneiro. As bases do certame, para textos cun máximo de doce liñas en corpo de letra 12, esixían o emprego da palabra "choiva" na historia.