Antonio Piñeiro faise co Torrente Ballester de narrativa en galego

O escritor Antonio Piñeiro fíxose co Premio Torrente Ballester en Galego, coa novela A través do fume. O premio consiste en 25.000 euros (é o de maior contía para a literatura en galego) e a publicación da obra. En palabras do xurado, trátase dun "relato cunha grande habilidade narrativa que arrisca e funciona como mecano en que a persoa lectora ten que implicarse para construír o quebracabezas até a última páxina". O xurado estivo composto por Antón Riveiro Coello, Montse Dopico, María Reimóndez, Armando Requeixo e a gañadora da edición anterior, Eli Ríos, presidido pola vicepresidenta e responsábel da área de Cultura da Deputación da Coruña, Goretti Sanmartín Rei e coa xefa de servizo, Mercedes Fernández Albalat como secretaria. A novela de Piñeiro foi escollida entre as 12 finalistas das 59 presentadas. A súa conta de libros iníciase con Paisaxes de Cinza (Toxosoutos) en 2002 e nela atópanse obras como Tres contos de guerra (Colección Bourel), a novela A identidade fascinada (Editorial Galaxia, 2015) ou O noiro (Sotelo Blanco, 2016). Antonio Piñeiro é mestre de Historia no ensino público.