Andrea Nunes e María Rosendo gañan o Premio de Poesía Erótica cun libro a dúas voces

O 12º Certame de Poesía Erótica Illas Sisargas premiou unha obra a escrita a dúas voces por dúas mulleres. Andrea Nunes Brións (Marín, 1984) e María Rosendo (Vigo, 1984) foron as galardoadas polo poemario Diáspora de amor balea polo que recibirá o premio consistente en 1.000 euroS e a publicación. Segundo o xurado a obra defínese como un "epistolario a dúas voces nas que a forza do erotismo está na distancia física entre as voces. É un erotismo imaxinado, cálido, tenro, construído desde a memoria dos corpos e, á vez, na fertilidade da imaxinación. As dúas voces que falan no libro flutúan entre a mímese e a diferenza e dialogan a cada poema con fluidez e personalidade". O premio presentouse nun acto con motivo da Cea das Letras na localidade de Malpica, e na Casa da Cultura o escritor Xavier Queipo, galardoado o pasado ano recolleu o seu premio e presentou a obra editada, O home invisíbel.