A Sala de Gramáticos do Pazo de Xelmírez acollía onte a presentación do novo achado escultórico que se realizou no curso dos traballos de rehabilitación da catedral de Santiago. Representantes do Cabido, da Consellaría de Cultura e do Consorcio daban a coñecer publicamente a figura masculina mutilada que apareceu na parte baixa da torre das campás durante as excavacións arqueolóxicas que se realizaron en novembro de 2016. A peza descubriuse cando se abría un muro para extraer a estatua atribuída ao Mestre Mateo que aparecera na mesma cámara. A nova escultura fora reutilizada como material construtivo e adscríbese polas súas características ao chamado Mestre dos Panos Mollados, un artista ou taller que traballou nas obras da cateral cara ao ano 1170 e da que se conservan outras tres pezas no No Museo Catedral. As mesmas presentan como característica común un coidado traballo na representación dos pregues e das vestiduras.
Logo de ser sometida a unha profunda limpeza dos morteiros que tiña adheridos, a peza poderá verse ata o 11 de setembro na propia Sala de Gramáticos do Pazo de Xelmírez, e posteriormente viaxará a Madrid onde fará parte da mostra El poder del pasado. 150 años de arqueología en España. Despois deste periplo, depositarase no Museo da Catedral.
