A sede do Consello da Cultura Galega en Compostela acollía na tarde de onte a presentación pública do número 23 da revista Gallegos. Isaac Díaz Pardo protagoniza a nova entrega da publicación, cun caderno central que recolle artigos de Xavier Seoane, Teresa Pena, Daniel Beiras, Camilo e Xosé Díaz, Francisco Díaz-Fierros ou Ramón Villares entre outros. Canda a eles, o volume achega entrevistas a Manuel Sánchez Salorio, ao Ministro de Saúde arxentino Jorge Lemus e a Víctor López Rúa. Textos sobre a historia da elaboración de tabaco no noso país, a paisaxe da Ribeira Sacra ou o traballo de Sergio Portela son outros contidos presentes no novo número, que sae á venda a un prezo de quince euros.
