A Asociación de Actores e Actrices pide máis produción e orzamento para o CDG

A Asociación de Actores e Actrices de Galicia (AAAG) emitiu hoxe un comunicado amosando a súa inquedanza e decepción ante a programación presentada polo Centro Dramático Galego (CDG) esta mesma semana. A insuficiencia orzamentaria do Centro, reflectida nunha baixa produción e pouca contratación de elenco é o eixo da preocupación da AAAG. Para os representantes do actores non é aceptable o feito de que o CDG só ofreza en 2017 unha produción propia coa montaxe do Martes de Carnaval de Valle-Inclán , mesmo sinalan o feito de facer un "achegamento coxo" a esta triloxía representado só dúas das obras, desbotando a terceira Os cornos de Don Friolera por motivos orzamentarios, como a mesma directora do CDG, Fefa Noia, recoñeceu na presentación. A isto e AAAG engade o feito de que esta única produción propia do ano do CDG resolverase cun elenco de dez intérpretes , un volume de contratación que consideran insuficiente para un teatro nacional.

Desde a AAAG aseguran que nada obxectan das escollas e artísticas propostas polo CDG e mesmo as celebran pero non así a limitación da actividade por circunstancias económicas como escusa mentres "dende os Gobernos central e autonómico se aplaude e se celebra unha recuperación económica que resulta invisible", din no seu comunicado. No actual proxecto de orzamentos do 2017 recentemente presentado as cantidades que se propoñen para a Axencia Galega de Industrias Culturais (AGADIC) da que depende o CDG resulta practicamente a mesma que no ano en curso. Ante esta situación o actores reivindican que o Centro incremente a súa produción anual con outra montaxe entre os meses de novembro e decembro de 2017 e que incrementen o tamaño dos elencos e a contratación actoral. Desde a AAAg tamén creen necesario recuperar o Consello Asesor do CDG, un órgano desbotado que serviría como conexión entre a institución e a profesión. O programa da temporada do CDG presentouse esta semana e xa levaba como título global Contigo, pan e... Centro Dramático Galego nunha clara referencia ao refrán sobre os tempos de penuria económica.