Na primeira semana de maio sae ó mercado "BD Banda", unha revista que, desde Pontevedra, pretende cubrir un oco nas revistas de banda deseñada para adultos en todo o estado español.
Trátase dunha publicación alternativa, sobria, variada e de calidade, centrada nas historias e non na información sobre o xénero.
Para acadalo o equipo que pon en marcha esta publicación, no que está integrado Kiko Da Silva entre outros afeccionados ó xénero, sacará unha edición en galego e outra en castelán (dentro dun par de meses), destinada á súa distribución fóra.
Entre os colaboradores, nomes de luxo. Xan López Domínguez, Fran Jaraba, Miguelanxo Prado (no segundo número), Kiko Da Silva, Miguel Anxo Robledo (que ve por fin publicada a súa serie "Os cabezóns"), Fernando Ruibal, Siro López, Xaquín Marín, Marcos Paz Navas, e aínda máis.
Para o día dezaoito de maio está previsto que comezen as presentacións por toda a xeografía galega, e en canto estea lista edición en castelán, realizarase unha presentación no FNAC de Madrid.
A idea da revista, realizada a base de traballo non remunerado, é a de que os ingresos de cada número sirvan para pagar o seguinte, dando a oportunidade de que moitos autores novos se promocionen onda outros consagrados a nivel estatal.