O Premios da Crítica recoñecen a María do Cebreiro, a Uxía e a Alberte Pagán

Os xurados dos Premios da Crítica de Galicia deron a coñecer este sábado o ditame da XXXIX xeira destes galardóns nas súas diferentes modalidades. Nesta ocasión, María do Cebreiro foi a seleccionada no apartdo de creación literaria polo seu traballo O deserto que editou Apiario. O xurado destacou que "a alta calidade do libro radica tanto na súa autenticidade, propia dunha voz tan persoal como é a da autora, como na integración de diversas referencias culturalistas que aínda así non impiden a intelixibilidade da mensaxe poética". Canda a ela, recibiu o premio na categoría de música Uxía, en recoñecemento á "súa condición de ponte entre as distintas culturas da lusofonía e de divulgadora da poesía galega, especialmente no eido infantil". Alberte Pagán foi o homenaxeado no ámbito audiovisual, a recoñecer "a súa condición de cineasta total, así como a integridade e coherencia no seu traballo tanto intelectual como artístico".

Tamén se deron a coñecer os premiados nas categorías de Artes Escénicas, nesta ocasión Teatro do Atlántico, e artes plásticas, cuxo premio foi para Gabriel Tizón. A Historia da literatura infantil e xuvenil galega valeulle a Blanca Roig facerse co Premio de Investigación, mentres a iniciativa Artesáns da Pesca, obtivo o Premio de Cultura gastronómica e o Observatorio da Mariña pola Igualdade foi recoñecido co Premio de Iniciativas Culturais e Científicas.

No mesmo día celebrouse tamén, no Hotel Os Escudos de Vigo a entrega destes premios, que convoca a Fundación Premios da Crítica. O acto desenvolveuse baixo o lema "En Irmandade", a lembrar o centenario das Irmandades da Fala, e contou coa presenza de 350 persoas de diversos ámbitos da política, da sociedade e da actividade cultural do país.