Danza das Espadas. Fonte: Ateneo Santa Cecilia.
A coincidir coa celebración polo San Miguel da tradicional Danza das Espadas, Marín acolle este sábado o I Encontro sobre Danzas Brancas. O Ateneo Santa Cecilia, que organiza esta iniciativa en colaboración co Padroado e Mareantes, recibirá este sábado no Museo Manuel Torres a representantes de diferentes bailes deste tipo que se celebran en Galicia. Segundo explica a organización, o obxectivo deste primeiro encontro "poñer en común experiencias, propoñer estratexias para fortalecer estas expresións antropolóxicas e analizar que medidas cómpre adoptar para que ningunha corra o risco de desaparecer". O programa da fin de semana continuará o domingo día 2 con varias representacións da danza Danza de Espadas en diferente lugares da vila.
