Os festivais agrupados na marca RíasBaixasFests reuniron preto de 200.000 persoas

Xa deixaron de soar os derradeiros acordes e se desmontaron todos os escenarios e chegou o tempo da valoración dos sete grandes festivais da provincia de Pontevedra. Desde a Deputación de Pontevedra estímase que as sete quendas incluídas nos "Festivais Rías Baixas" reuniron a preto de 200.000 persoas e rexistraron un impacto económico total de 26 millóns de euros para os seus concellos e comarcas, nas que as ocupacións hoteleiras durante os días das súas celebracións foron dun 100% practicamente en todas as ocasións. A creación de emprego directo estímase en máis dun milleiro de postos de traballo. Festivais como Revenidas, Sinsal, SonRías e Marisquiño acadaron as súas marcas de asistencia máxima e o Cultura Quente aumentou nun 20 por cento respecto ao anterior ano.

Nun acto que tivo lugar esta semana na sede de Turismo Rías Baixas escenificouse o peche dos "Festivais Rías Baixas" 2016 contando coa presenza da Presidenta da Deputación de Pontevedra, Carmela Silva, así como as persoas promotoras, organizadoras e patrocinadoras de cada un dos sete festivais que conforman a marca #RíasBaixasFests e representantes dos gobernos das sete vilas onde tiveron lugar, isto é: Cultura Quente (Caldas de Reis), Atlantic Fest (A Illa de Arousa), PortAmérica (Nigrán), SinSal Son Estrella Galicia (a Illa de San Simón en Redondela), SonRías Baixas (Bueu), O Marisquiño (Vigo) e Revenidas (Vilagarcía de Arousa).