Con crowdfunding de por medio, os vigueses Sindicato da Noite acaban de presentar o seu primeiro disco, que chamaron igual que o grupo. O proxecto que lidera o contrabaixista cubano José Manuel Díaz Iglesias aposta por un son no que fican claras as raíces jazzísticas do proxecto. Con estas mestúranse tons pop, aires soul e ritmos de rock coa voz de Su Garrido a cantar en francés, español ou portugués como nexo de unión. Canda a eles, o guitarrista Felipe Villar, Max Gómez á batería e Álex Salgueiro a se ocupar da flauta, completan a formación. En total, o disco achega trece temas, compostos polo propio Díaz, e inclúe Esse amor mudou, no que a letra correu a cargo do escritor Xavier Queipo. A estrea oficial do álbum está prevista para o vindeiro 26 de agosto no concerto gratuíto que o grupo dará na Casa da Torre, en Redondela.
