A presenza galega nos premios do Saló del Cómic de Barcelona diminuiu notablemente desde que estes premios se reduciron ás categorías de mellor autor ou autora, mellor obras estranxeira, autor revelación e mellor fanzine. Deste xeito, este ano a única representación galega nas candidaturas é a de Jorge Monlongo. Este creador nado en Ribadeo e asentado en Madrid leva anos a traballar para diferentes franquías do mercado americano (Hello Kitty, Mameshiba, Vaca e Polo ou Peabody e Sherman) e publicou con Caramba! este ano No me pegues que llevo gafas, unha sátira sobre o mundo hipster. A outra pegada galega nestes galardóns é a candidatura da cabeceira valenciá Nimio, na que teñen colaborado varios autores do país ao premio ao mellor fanzine.
